- Rev. Jerome,Silchar
Nikum khan he thu hmang hian ka ziak tawh a,kumin pawh hian kan thil tawn leh hmuh te han ngawihbo pui mai chu a har leh hle mai.
Kum dang ang bawkin Christmas festival hmang turin Silchar Mission Compound kan inbuatsaih nasa leh khawp mai,Krismas tuk thlengin hnathawh a la ngaih hial mai. Vawiin 5:00 pm ah programme hlanna kan nei a,kan tan ta. Mission Vengthlang Kohhran atangin KTP an rawn kal a,an item a va han tha hlawm tak em!
Vai ho hian huau huau hi an lawm viau a ni mai em? Isua Krista hnen atanga malsawm dawn beiseiin an rawn kal a ni zawk thei ang em? Kumtin mai hian he zawhna hi ngaihtuahna ah a lut thin. Nikum a ka post khan mi tam takin harhna a thleng ta emaw ti a min rawn bia te pawh an awm.Nia,harhna chikhat chu a ni thovah ngai ila,amaherawhchu baptisma chang chiam zawng a ni lo tih erawh hre tel bawk ila.
Kan tan ta,music an ri dup dup...kan va han pung chak teh reng em! Mipui a tam a tam an rawn pungkhawm leh ta. Traffic lah a zam nasa leh kher mai. Traffic lam pawh no entry min siamsak turin kan dil a,an rem ti lo leh a. An inchhir hian ka va ring thin em! Silchar chu city of horn (ka ti mai thin) zanin zet chu a zual ta emaw tih mai tur a ni leh ta. Mi sing chuang zet mai. Isua Krista piancham programme kan siam hmang tura an rawn kal hi a ropui ka ti tawp thei lo. Mi heti zat koh khawm hi keini tan chuan a theih loh. Krismas ni ah erawh chuan Isua Kristan a va rawn hruai lut hnem ngai em! Kan evangelist ten thiam tak mai leh duhthawh tak maiin sermon puitling an han thlak tehreng a nia,Lalpa malsawm ang che aw tiin kan lo tawngtai mawlh mawlh mai. Isua leh a nu leh pa lem hmaah bati chhi a,chibai buk a tawngtai mawlh mawlh mai mi tam tak han hmuh te khan rilru a tawngtaina nen kan va han lawm tak em! Hindu sakhaw chhungah chuan engkim a leng vek pawh an ti thin,a tawngtu nih hi chuan a dan hi a dang tlat zel asin.Bible tract kan va han sem hnem tak em! Sing fe mai kan sem kha a thlawn lovang tih kan ring. Hetiang programme a kan sem an chhiar avanga baptisma chang kan nei tawh tlat alawm.
Silchar Central Jail a an hotupa pawh a rawn lang ve leh hlawl mai. A ni hian Isua Krista chanchin hi a ngaihven khawp mai a,kan evangelist te pawhin counselling an nei fo mai. A chang changin zing tawngtai inkhawmah te pawh a rawn tel thin nia. Hepa pawh hi engtikah emaw chuan baptisma a chan kan beisei. Ama zarah Silchar Central Jail ah kan rawngbawltu ten rawngbawlna hlu tak tukin thleng khan an la neih theih phah a ni.
Mission Vengthlang Kohhran KTP te an fakawm ngei mai. An item zawng zawng an hneh em em mai a. An hmel hmuh a hahdam si. An tlangval te lah an bengvarin an zuan a zang,an nula te lah an hmeltha in an fel,an vaiin Mizo Kristian an ni e tih hi ka sawi thiam dan an ni. Kan Kohhran hian hmalam eng tak kan nei zel tih hi an rawn puangchhuak ni berin ka hria. Kan va lawm em!
Silchar ah hian Lalpan a ram a zauh zel ang. Krismas chibai vek e. Programme kan la hmang zel e,min lo tawngtaipui rawh u.
December 25, 2018
Source : Whatsapp
